BEYNƏLXALQ SİMPOZİUMUN PLENAR İCLASI
Bakı Dövlət Universitetində (BDU) “Yaşıl dünya naminə həmrəylik ili”nə həsr olunmuş “İnformasiya menecmenti və davamlı inkişaf” mövzusunda III Beynəlxalq Ənənədən Gələcəyə İnformasiya və Sənəd Menecmenti Simpoziumunun plenar iclası keçirilib. Qeyd edək ki, Simpozium Bakı Dövlət Universiteti, Türkiyənin Bartın Universiteti, Çankırı Karatekin Universiteti, Kastamonu Universitetinin birgə təşkilatçılığı ilə keçirilir.
Simpoziumun plenar iclasında BDU-nun dosenti Pərviz Kazimi “Yaşıl kitabxana konsepsiyası”, Kastamonu Universitetinin dosenti Güler Demir “Davamlı inkişaf və yaşıl kitabxanalar” mövzularında məruzə ediblər.
Simpoziumda ümumilikdə Azərbaycan, Türkiyə və Özbəkistanın 17 universitetini təmsil edən nüfuzlu alimlərin, professorlar, gənc tədqiqatçılar, həmçinin Türkiyə Milli Təhsil Nazirliyinin, Mədəniyyət Nazirliyinin, Türkiyənin bir sıra bələdiyyə kitabxanalarının, ölkəmizin kitabxana və muzeylərinin əməkdaşlarının 60-a yaxın məruzəsinin dinlənilməsi nəzərdə tutulub.
