Bakı Dövlət Universiteti İnformasiya və sənəd menecmenti fakültəsi

Azərbaycan Dövlət Televiziyasının əməkdaşı Vüsal Mətləb Bakı Dövlət Universitetinin (BDU) İnformasiya və sənəd menecmenti fakültəsinin tələbələri üçün “Xəbər nədir? O necə hazırlanmalıdır?” mövzusunda təlim keçib. Vüsal Mətləb əvvəlcə vaxtı ilə təhsil aldığı fakültədə təlim keçməyin onun üçün qürurlu, eyni zamanda məsuliyyətli olduğunu bildirib.

Təlim zamanı xəbərin formulu, strukturu, yazılma qaydaları müxtəlif xəbər agentliklərinin materialları əsasında konkret nümunələrlə şərh olunub. İnformasiya sənayesinin sürətlə inkişaf etdiyi müasir dövrdə xəbər istehsalının spesifik xüsusiyyətlərini izah edən təlimçi ilkin məlumatın əldə edilməsi, emalı və ötürülməsi prosesi barədə tələbələrdə geniş təəssürat yaradıb, xüsusilə özünün bu sahədəki təcrübəsini bölüşüb. Vüsal Mətləb informasiya bolluğu şəraitində səhih xəbərlərlə yanaşı yalan, təhrif olunmuş xəbərlərin də mediada özünə asanlıqla yer tapdığını, bu tendensiyanın bütün dünyada geniş yayıldığını bildirib: “Bu kimi halların geniş vüsət almaması üçün hər hansı xəbər ilkin və etibarlı mənbədən alınmalı, eyni zamanda informasiyanın mahiyyətinə uyğun müvafiq rəsmi qurumlarla dəqiqləşdirmə aparılmalıdır. Həmçinin xəbərin mahiyyətinə uyğun olaraq qarşı tərəflərin mövqeyi xəbərdə əks olunmalıdır”.    

Təlim zamanı reportyorun hadisə yerində işləmək bacarıqları və vərdişləri, təhlükəli zonalarda çalışmaq riskləri, operativ və qərəzsiz xəbər çatdırma üsulları kimi mühüm məsələlər izah edilib. Vüsal Mətləb tələbələrə xəbərin əldə olunması, hazırlanması və ötürülməsi barədə konkret tapşırıqlar verib, onların cavabları müvafiq şəkildə qiymətləndirilib.

İnteraktiv formada keçirilən təlim tələbələrin xüsusi marağına səbəb olub, təlimçiyə çoxsaylı suallar ünvanlanıb.