Bakı Dövlət Universiteti İnformasiya və sənəd menecmenti fakültəsi

Bakı Dövlət Universitetinin (BDU) İnformasiya və sənəd menecmenti fakültəsində “Ulu Öndər Heydər Əliyev və klassik irsimiz” mövzusunda ustad dərsi keçirilib. Ustad dərsində Azərbaycan Milli Elmlər Akademiyasının (AMEA) Məhəmməd Füzuli adına Əlyazmalar İnstitutunun direktoru, akademik Teymur Kərimli mövzu ilə bağlı məruzə edib.

Akademik Teymur Kərimli xalqımızın Ümummilli Lideri Heydər Əliyevin siyasi hakimiyyətinin hər iki dövründə milli-mənəvi dəyərlərimizə, klassik irsimizə qayıdış prosesinin həyata keçirilməsindəki müstəsna xidmətlərini tarixi dövrləşdirmə əsasında elmi-nəzəri baxımdan şərh edib. Bildirib ki, Ulu Öndər Heydər Əliyev Azərbaycan klassik irsinə hər zaman sevgi və qayğı ilə yanaşıb, bu irsin öyrənilməsi, tədqiqi və təbliğinə mühüm töhfələr verib: “Ulu Öndər Azərbaycan yazılı abidələrinə, xüsusilə əlyazma irsimizə həssaslıqla yanaşmış, Respublika Əlyazmalar Fondunun xüsusi elmi tədqiqat institutu statusu almasına nail olmuşdur. Heydər Əliyev həm sovet dövründə, həm də müstəqillik illərində Əlyazmalar İnstitutunu ziyarət etmiş, “Kitabi-Dədə Qorqud” dastanının Drezden nüsxəsinin faksimilesini İnstituta hədiyyə etmişdir”.

Məruzədə Ümummilli Lider Heydər Əliyevin dövlət tədbirlərindəki çıxışlarından, ziyalılarla görüşlərində səslənən nitqlərindən, klassik irsimizin qorunması, yaşadılması və gələcək nəsillərə ötürülməsi ilə bağlı imzaladığı mühüm fərman və sərəncamlarından nümunələr gətirilərək müdrik rəhbərin klassik irsimizin böyük təəssübkeşi və hamisi olduğu vurğulanıb.

Akademik Teymur Kərimlinin mühazirəsi auditoriya tərəfindən böyük maraqla dinlənilib, məruzəçi dinləyicilərin mövzu ilə bağlı çoxsaylı suallarını cavablandırıb.