ƏCNƏBİ DOKTORANTIN İLKİN MÜZAKİRƏSİ KEÇİRİLİB
Bakı Dövlət Universitetinin (BDU) İnformasiya və sənəd menecmenti fakültəsində Kitabxana-informasiya resurslarının idarə edilməsi kafedrasının doktorantı, Əlcəzair Xalq demokratik Respublikasının vətəndaşı Lemounes Nour El Houda Djoumananın “Azərbaycan Respublikasının ali təhsil müəssisələrinin rəqəmsal kitabxana-informasiya resurslarının idarə olunması sisteminin işlənməsi (BDU-nun Elmi Kitabxanası, ADA Universiteti Kitabxanası və UNEC Kitabxana İnformasiya Mərkəzinin iş təcrübəsi əsasında)” mövzusunda fəlsəfə doktorluğu üzrə dissertasiya işinin ilkin müzakirəsi keçirilib.
Dissertasiya işi ali məktəb kitabxanalarının rəqəmsal resurslarının təhlili və tədqiqi baxımından xüsusi əhəmiyyət kəsb edir. Lemounes Nour El Houda Djoumananın təqdim etdiyi dissertasiya işində BDU-nun Elmi Kitabxanası, ADA Universiteti Kitabxanası və UNEC Kitabxana İnformasiya Mərkəzinin innovativ iş üsulları araşdırılır. Təqdim olunmuş dissertasiya işində hər üç kitabxana-informasiya müəssisəsinin bu sahədəki təcrübəsi öyrənilir, onların fəaliyyəti, iş üsulları ilə əlaqədar müqayisəli təhlillər aparılır, bir sıra təkliflər irəli sürülür. Tədqiqat işinin əhatə dairəsi, doktorantın problemə yanaşma tərzi mövzunun aktuallığını şərtləndirir.
Dissertasiyanın nəticə hissəsində mövzunun cəmiyyətə təsir mexanizminə aydınlıq gətirilir, problemin tədqiqi ilə bağlı dünya təcrübəsinə əsaslanaraq elmi ümumiləşdirmələr aparılır, tədqiqatın elmi, nəzəri və təcrübi yekunu ifadə olunur, sahənin inkişafı ilə əlaqədar praktik təkliflər irəli sürülür.