Fakültə dekanı Beynəlxalq Simpoziumda məruzə edib
Bakı Dövlət Universitetinin (BDU) İnformasiya və sənəd menecmenti fakültəsinin dekanı dosent Ələmdar Cabbarlı Türkiyə Cümhuriyyətinin Çankırı şəhərində Çankırı Karatekin, Bartın, Kastamonu universitetlərinin Bilgi və bəlgə yönətimi bölümlərinin və BDU-nun İnformasiya və sənəd menecmenti fakültəsinin birgə təşkilatçılığı ilə keçirilən “II Beynəlxalq ənənədən gələcəyə informasiya və sənəd menecmenti simpoziumu”nda iştirak edib. Türkiyə Cümhuriyyətinin 100-cü ildönümünə həsr edilmiş Beynəlxalq simpoziuma müxtəlif ölkələrin informasiya və sənəd menecmenti, kitabxanaçılıq və informasiya ixtisasları üzrə kadr hazırlayan 20-dən artıq universitetinin təmsilçiləri qatılıb. Simpoziumda sənəd menecmenti, informasiya logistikası, müəlliflik hüquqları və əlaqəli hüquqlar, kitabxanaçılıq və informasiya fəaliyyəti, kitab yayımı kimi mühüm istiqamətlər üzrə məruzələr dinlənilib. İnformasiya və sənəd menecmenti fakültəsinin dekanı Ələmdar Cabbarlı “Texnoloji inqilab və oxucu vərdişləri” mövzusunda məruzə edib, eyni zamanda simpoziumun Təşkilat Komitəsinin üzvü kimi fəaliyyət göstərib. Fakültə dekanı səfər müddətində Çankırı Karatekin Universitetinin rektoru professor Harun Çiftçi ilə görüşüb. Görüşdə rektora ölkəmizdəki təhsil mühiti, BDU-nun tarixi və bu günü, eyni zamanda fakültə barədə məlumat verilib. Çankırı Karatekin Universitetinin Bilgi və bəlgə yönətimi bölümü ilə BDU-nun İnformasiya və sənəd menecmenti fakültəsi arasında əməkdaşlığın müxtəlif platformalarda davam və inkişaf etdirilməsi imkanları müzakirə olunub.
Üç gün davam edən tədbirin yekun toplantısında qəbul edilmiş sənəddə Beynəlxalq Simpoziumun üçüncüsünün 2024-cü ilin noyabr ayında Bakı Dövlət Universitetində keçirilməsi təklifi irəli sürülüb.
