FAKÜLTƏ RESPUBLİKA KONFRANSINDA TƏMSİL OLUNUB
Bakı Dövlət Universitetinin (BDU) İnformasiya və sənəd menecmenti fakültəsinin əməkdaşları Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) “Kitabxana-informasiya texnologiyalarının inkişafında müasir tendensiyalar” mövzusunda keçirilən respublika elmi konfransında iştirak ediblər. Ümummilli Lider Heydər Əliyevin anadan olmasının 102-ci ildönümünə və Mərkəzi Elmi Kitabxananın yaranmasının 100 illiyinə həsr olunan konfransda AMEA elmi-tədqiqat institutlarının, ali təhsil müəssisələrinin kitabxana müdirləri, Yasamal rayon üzrə YAP ərazi partiya təşkilatlarının sədrləri, ictimai xadimlər, media nümayəndləri iştirak edib. AMEA-nın prezidenti akademik İsa Həbibbəyli konfransı giriş nitqi ilə açaraq bildirib ki, 100 illik yubileyini qeyd edən Mərkəzi Elmi Kitabxana ölkənin aparıcı elmi kitabxanası kimi fəaliyyət göstərir. Akademik vurğulayıb ki, bu gün kitabxananın fəaliyyətində əsas istiqamət “Elektron Kitabxana” konsepsiyası çərçivəsində oxuculara müasir xidmət modelinin hazırlanıb tətbiq edilməsidir. Akademik son dövrlərdə bu istiqamətdə mühüm nailiyyətlərin əldə olunduğunu qeyd edib.
Açılış mərasimində çıxış edən Bakı Dövlət Universitetinin İnformasiya və sənəd menecmenti fakültəsinin dekanı dosent Ələmdar Cabbarlı son illər fakültə ilə Mərkəzi Elmi Kitabxana arasında əməkdaşlığın müxtəlif platformalarda inkişafı barədə geniş məruzə edib, konfransın işinə uğurlar arzulayıb.
Konfrans işini “Heydər Əliyev və Azərbaycanda kitab mədəniyyəti”, “Rəqəmsal kitabxanaların formalaşdırılması və idarə olunması”, “Elm-kitabxana-cəmiyyət qarşılıqlı əlaqədə”, “Kitabxanalarda istifadəçi təcrübəsinin təkmilləşdirilməsi üçün innovativ yanaşmalar”, “İnteraktiv multimedia və rəqəmsal sərgilərin təşkili” bölmələri üzrə davam etdirib. İnformasiya və sənəd menecmenti fakültəsinin əməkdaşları bölmə iclaslarında məruzələrini təqdim ediblər.