Milli Kitabxanada fakültənin yubileyi qeyd edilib
Bakı Dövlət Universitetinin Kitabxanaçılıq-informasiya fakültəsinin yaranmasının 60 illiyinə həsr olunmuş “Sənəd və informasiya menecmenti üzrə kadr hazırlığı: üstünlükləri, perspektivləri” mövzusunda beynəlxalq elmi konfrans öz işini Azərbaycan Milli Kitabxanasında davam etdirib. Tədbirdə Azərbaycan Milli Kitabxanasının əməkdaşları, Kitabxanaçılıq-informasiya fakültəsinin professor-müəllim heyəti və tələbələri, Türkiyə Cümhuriyyətinin Kastamonu Universitetinin Bilgi və bəlgə yönətimi fakültəsinini dekanı professor Hasan Kəsəroğlu və digər qonaqlar iştirak edib. Milli Kitabxananın direktoru, professor Kərim Tahirov Kitabxanaçılıq-informasiya fakültəsinin tarixi, bu günü, gələcək perspektivləri baradə məlumat verib, Milli Kitabxana ilə fakültənin əlaqələrinin günbəgün möhkəmləndiyini qeyd edib. Fakültənin yaranmasında Əməkdar elm xadimi, professor Abuzər Xələfovun müstəsna xidmətlərini vurğulayan Kərim Tahirov bildirib ki, bu gün Kitabxanaçılıq-informasiya fakültəsi elm ocağı, formalaşmış bir tədris müsəssisəsi kimi tanınır. Elmi konfransın açılışının Bakı Dövlət Universitetində olduğunu deyən BDU-nun Kitabxanaçılıq-informasiya fakültəsinin dekanı, dosent Ələmdar Cabbarlı söyləyib: “Beynəlxalq mütəxəssislərin qatıldığı bu tədbirdə universitetin rektoru Elçin Babayev çıxış edib, fakültənin gələcək perspektivləri barədə danışıb, həyatda olmayan müəllimlərin xatirəsini yaşatmağı tövsiyə edib”.
Türkiyə Cümhuriyyətinin Kastamonu Universitetinin Bilgi və bəlgə yönətimi fakültəsinini dekanı professor Hasan Kəsəroğlu, BDU-nun Biblioqrafiyaşünaslıq kafedrasının müdiri Nadir İsmayılov, Kitabşünaslıq və nəşriyyat işi kafedrasının müdiri Knyaz Aslan, Kitabxanaşünaslıq kafedrasının müdiri Elçin Əhmədov, Kitabxana resursları və informasiya axtarış sistemləri kafedrasının müdiri Sevda Xələfova, Milli Kitabxananın direktor müavini Ədibə İsmayılova, dosentlər Xuraman Ağayeva, Solmaz Sadıqova müvafiq mövzular üzrə məruzə ediblər.
Sonda fakültə haqqında, fakültənin tanınmış məzunları, həmçinin fakültənin nəşrləri ilə bağlı videoçarx göstərilib.
