Bakı Dövlət Universiteti İnformasiya və sənəd menecmenti fakültəsi

İnformasiya və sənəd menecmenti fakültəsinin Kitabxana-informasiya resurslarının idarə edilməsi kafedrasının professoru, Əməkdar mədəniyyət işçisi, tarix elmləri doktoru Xəlil İsmayılovun 80 illik yubileyidir.

Xəlil İsmayılov 1967-1972-ci illərdə BDU-nun Kitabxanaçılıq fakültəsində təhsil almışdır. 1974-cü ildən BDU-nun Kitabxanaşünaslıq kafedrasında əmək fəaliyyətinə başlamış, 1976-1979-cu illərdə aspiranturada təhsil almış, 1984-cü ildə namizədlik, 2004-cü ildə doktorluq dissertasiyaları müdafiə etmişdir. 1987-ci ildə dosent, 2007-ci ildə professor elmi adlarını almış, 1990-1993-cü illərdə Kitabxanaşünaslıq, 2007-2019-cu illərdə Kitabxana resursları və informasiya axtarış sistemləri kafedralarının müdiri, 1993-2012-ci illərdə Kitabxanaçılıq-informasiya fakültəsinin dekanı vəzifələrində çalışmışdır.

Professor Xəlil İsmayılov Azərbaycan Respublikasının Prezidenti İlham Əliyevin müvafiq Sərəncamları ilə 2009-cu ildə “Əməkdar mədəniyyət işçisi” fəxri adını almış, 2019-cu ildə “Tərəqqi” medalı ilə təltif edilmişdir.

Azərbaycan Respublikasının Prezidenti yanında Ali Attestasiya Komissiyası tərəfindən 2020-ci ildən AMEA Tarix və Etnologiya İnstitutu nəzdində yaradılan 3356.01 - “Kitabxanaşünaslıq, biblioqrafiyaşünaslıq və kitabşünaslıq” ixtisası üzrə Elmi seminarın sədridir. Elmi rəhbərliyi ilə 12 nəfər fəlsəfə, 1 nəfər elmlər doktorluğu dissertasiyası müdafiə etmişdir.

Professor Xəlil İsmayılovu kollektivimiz və tələbələrimiz adından təbrik edirik, əziz və dəyərli müəllimimizə uzun ömür, möhkəm cansağlığı, elmi-pedaqoji fəaliyyətində uğurlar arzulayırıq.