SUVERENLİK GÜNÜ İLƏ BAĞLI TƏDBİR
“BDU könüllüləri” təşkilatı və İnformasiya və Sənəd Menecmenti fakültəsinin birgə təşkilatçılığı ilə “Dövlət Suverenlik Günü” ilə bağlı tədbir keçirilib.
Əvvəlcə Azərbaycan Respublikasının Dövlət Himni səsləndirilib. Ümummilli Lider Heydər Əliyevin, Azərbaycanın ərazi bütövlüyü uğrunda canlarını qurban vermiş şəhidlərimizin xatirəsi 1 dəqiqəlik sükutla yad edilib.
Tədbirdə giriş sözü ilə çıxış edən İnformasiya və sənəd menecmenti fakültəsinin sosial məsələlər və tələbələrlə iş üzrə dekan müavini Daşqın Məhəmmədli ölkə Prezidenti İlham Əliyevin ötən gün imzaladığı Sərəncama əsasən hər il sentyabrın 20-nin Azərbaycan Respublikasında “Dövlət Suverenliyi Günü” kimi qeyd ediləcəyini vurğulayıb. 2023-cü il sentyabrın 19-20-də keçirilmiş lokal xarakterli antiterror tədbirləri nəticəsində Azərbaycanın ərazi bütövlüyünün və dövlət suverenliyinin tam bərpa olunduğunu və şanlı tariximizə ən parlaq səhifələr yazıldığını diqqətə çatdırıb.
Daha sonra Redaksiya-nəşriyyat işi kafedrasının müdiri, Birinci Qarabağ müharibəsinin iştirakçısı Knyaz Aslan bildirib ki, cəmi 23 saat davam edən və sentyabrın 20-də başa çatan, suverenliyimizin tam bərpası ilə yekunlaşan, separatizmə son qoyan lokal xarakterli antiterror tədbirlərindən bir il ötür. Qürurvericidir ki, bu gün Azərbaycanın Dövlət Bayrağı suverenliyimizin bərqərar olduğu bütün ərazilərdə əzəmətlə dalğalanır.
Sonda isə Sənəd menecmenti kafedrasının müdiri, dosent Nadir İsmayılov qəhrəman əsgər və zabitlərimizin, şəhidlərimizin qanı hesabına əldə edilmiş ərazi bütövlüyümüzün, suverenliyimizin xalqımızın milli sərvəti olduğunu bildirib, 20 sentyabr tarixinin Azərbaycanda “Dövlət Suverenliyi Günü” kimi qeyd edilməsinin qürurunu yaşadığını dilə gətirib.
