ULU ÖNDƏRƏ HƏSR OLUNMUŞ ELMİ SEMİNAR
Bakı Dövlət Universitetinin (BDU) İnformasiya və sənəd menecmenti fakültəsində “Ümummilli Lider Heydər Əliyev irsinin biblioqrafik tədqiqində BDU-nun rolu” mövzusunda elmi seminar keçirilib. Elmi seminarda BDU-nun Sənəd menecmenti kafedrasının dosenti Solmaz Sadıqova mövzu ilə bağlı çıxış edib.
Əvvəlcə Ümummilli Lider Heydər Əliyevin Bakı Dövlət Universiteti haqqında söylədiyi kəlamlar iştirakçıların diqqətinə çatdırlıb. Vurğulanıb ki, Ümummilli Lider Heydər Əliyev həm sovet dövründə, həm də müstəqillik illərində BDU-nun himayədarı və hamisi olub. Universitetin inkişafına misilsiz töhfələr verib. Bu gün isə həmin siyasət ölkə Prezidenti İlham Əliyev tərəfindən uğurla davam etdirilir.
Məruzədə Ulu Öndər Heydər Əliyevin tükənməz və zəngin irsinin biblioqrafik tədqiqində Bakı Dövlət Universitetinin rolu qeyd olunub. Ulu Öndər Heydər Əliyevə həsr olunmuş informasiya resurslarının təhlili verilib. Ümummilli Lider Heydər Əliyevin zəngin irsinin gələcək nəsillərə çatdırılmasında biblioqrafik informasiya resurslarının əhəmiyyəti xüsusi vurğulanıb. Qeyd olunub ki, Bakı Dövlət Universitetinin Elmi Şurasının qərarı ilə 2003-cü ildə Ümummilli Lider Heydər Əliyevə həsr olunmuş biblioqrafik məlumat kitabı çap edilib. Universal xarakterli biblioqrafik əsər görkəmli dövlət xadimi, milli müstəqilliyimizin banisi, Ulu Öndər Heydər Əlirza oğlu Əliyevin 80 illik yubileyinə həsr olunub: “Hazırda biblioqrafik məlumat kitabının daha təkmilləşdirlmiş variantı çap mərhələsindədir”.
Solmaz Sadıqovanın məruzəsi maraqla dinlənilib, məruzəçiyə çoxsaylı suallar ünvanlanıb.
